सुनको मूल्यमा फेरि नयाँ रेकर्ड, तोलाको १ लाख २७ हजार ८ सय रुपैयाँ पुग्यो
सुनको मूल्यमा फेरि नयाँ रेकर्ड कायम भएको छ । नेपाल सुनचाँदी व्यवसायी महासङ्घले आज सुन प्रतितोला १ लाख २७ हजार ८ सय रुपैयाँ तोकेको छ । जुन अहिलेसम्मकै उच्च मूल्य हो ।
यसअघि हिजो १ लाख २५ हजार २ सय रुपैयाँमा कारोबार भएको सुनको मूल्य आज २ हजार ६ सय रुपैयाँले बढेर १ लाख २७ हजार ८ सय रुपैयाँ पुगेको हो । यस्तै फागुन २९ गते सुनको मूल्य प्रतितोला १ लाख २६ हजार रुपैयाँमा कारोबार हुँदा नयाँ रेकर्ड बनेको थियो । अन्तर्राष्ट्रिय बजारमा सुनको मुल्य बढेसँगै नेपालमा पनि बढ्ने नेपाल सुनचाँदी व्यवसायी महासङ्घले जनाएको छ ।
चाँदीको मूल्य पनि अहिलेसम्मकै उच्च भएको छ । हिजो तोलामा १ हजार ५ सय २० रुपैयाँ रहेको चाँदी आज ३५ रुपैयाँ बढेर १ हजार ५ सय ५५ रुपैयाँ पुगेको छ ।
