पोखरा महानगरपालिकाले आफ्नो क्षेत्रभित्र कृषि कार्यमा प्रयोग हुने ठुलो ट्र्याक्टर तथा हाते ट्र्याक्टर (मिनिटिलर) को भाडा दर निर्धारण गरेको छ । महानगरपालिकाको यातायात व्यवस्थापन समिति, कृषि सञ्जाल तथा सम्बद्ध सरोकारवाला निकायहरुबीच जेठ १८ गते बसेको संयुक्त बैठकले यो निर्णय गरेको हो । महानगरभित्र कृषि मेसिनरीको भाडा दरमा एकरूपता ल्याउन, कृषकहरूलाई सुलभ दरमा सेवा उपलब्ध गराउन र कृषि उत्पादन लागत घटाउने उद्देश्यले भाडा दर तोकिएको हो । यो निर्णय आजकै मितिदेखि महानगरपालिका क्षेत्रभित्र तत्काल लागु हुनेछ ।
बैठकले मिनिटिलर अर्थात् हाते ट्र्याक्टरको भाडा दर दुई किसिमले तय गरेको छ । कृषि समूह वा कृषकले आफ्नै लगानीमा खरिद गरेको मिनिटिलरको हकमा प्रति घण्टा १ हजार २० रुपैयाँ भाडा निर्धारण गरिएको छ । यसैगरी अनुदान प्राप्त यन्त्रको हकमा भने प्रति घण्टा ९ सय रुपैयाँ मात्र भाडा कायम गरिएको छ । ठुलो ट्र्याक्टरको भाडा दर भने सञ्चालन अवधिको आधारमा तय गरिएको छ । ठुलो ट्र्याक्टर ३० मिनेटभन्दा बढी सञ्चालन भएको खण्डमा प्रति घण्टा ३ हजार ४ सय रुपैयाँ भाडा तिर्नुपर्नेछ । यदि ट्र्याक्टर ३० मिनेटभन्दा कम सञ्चालन भएको खण्डमा भने प्रति मिनेट ६० रुपैयाँका दरले भाडा भुक्तानी गर्नुपर्ने व्यवस्था गरिएको छ ।
महानगरपालिकाले बजारमा इन्धनको मूल्यमा हुने घटबढ र फेरबदलका आधारमा उक्त भाडा दरमा नियमानुसार समयसापेक्ष समायोजन गरिने जानकारी दिएको छ । तोकिएको दरभन्दा बढी शुल्क लिएको वा कृषकहरूलाई मर्का पारेको पाइएमा प्रचलित कानुन, स्थानीय ऐन तथा नियमावली अनुसार सम्बन्धित वडा कार्यालयले तत्काल आवश्यक कारबाही प्रक्रिया अगाडि बढाउने निर्णय भएको छ । ‘कृषि क्षेत्रलाई आधुनिकीकरण गर्दा किसानलाई मर्का पर्न नदिन भाडा दरमा एकरूपता ल्याएका हौं, यसको उल्लंघन भएमा तत्काल कारबाही हुन्छ,’ आर्थिक विकास महाशाखाका प्रमुख मनहर कडरियाले भने । उनले महानगरपालिका क्षेत्रभित्र कार्यरत सम्पूर्ण कृषि समूह, सहकारी, कृषि यन्त्र सञ्चालक तथा सरोकारवालाहरूलाई उक्त निर्धारित दररेट पूर्ण रूपमा पालना गरी सहयोग पुर्याइदिन हार्दिक आह्वान समेत गरे ।
